14-уми июли  соли 2023   дар кинотеатри ба номи Тоҳир Собиров ҷаласаи ҳайати мушовараи Муассисаи давлатии «Тоҷикфилм» доир ба ҷамъбасти   фаъолияти Муассисаи давлатии «Тоҷикфилм» дар   нимсолаи аввали  соли 2023 ва вазифаҳо барои давраҳои минбаъда баргузор гардид.

Дар ҷаласа аъзои ҳайати мушовара, сардорони Сарраёсатҳо, сардорони Раёсатҳои муассиса  ва  дигар масъулон иштирок намуданд.

Зимни  ҷаласаи ҷамъбастӣ ҳисоботи сардорони воҳидҳои сохтории муассиса шунида шуд.

Директори Муассисаи давлатии «Тоҷикфилм» муҳтарам Маҳмадсаид Шоҳиён,   дар ҷаласаи ҳайати мушовара вазъи соҳаи синаморо   дар     нимсолаи аввали соли 2023     мавриди таҳлилу баррасӣ қарор  доданд. 

Аз ҷумла, таъкид карда шуд, ки муассиса дар нимсолаи аввали  соли 2023 як қатор чорабиниҳоро дар сатҳи баланди омодагӣ ва ташкилӣ баргузор намуд.  

• 14-уми феврали соли 2023 дар толори мактаби синамонигорони ҷавон маротибаи дуюм Питчинг-рӯнамоии лоиҳаҳои синамоӣ бо иштироки киношиносон, коргардонҳо, филмноманвисон ва дигар алоқамандони синамо дар сатҳи зарурӣ доир гардида, аз 18 лоиҳаҳои пешниҳодшуда, 7-тои онҳо рӯнамоӣ ва муаррифӣ карда шуданд.  
• 3-юми марти соли 2023 дар толори мактаби синамонигорони ҷавони Муассисаи давлатии “Тоҷикфилм” ҷаласаи Шурои бадеии Муассисаи давлатии “Тоҷикфилм” доир ба муҳокима ва баррасии филмномаи филми ҳунарии таърихии муштараки “Дурахши ахтарон:Ҷомӣ ва Навоӣ баргузор гардид.   
• 14-уми марти соли 2023 продюсери силсилафилми ҳунарии “Комитет”, ки доир ба фаъолияту корнамоии  кормандони амният қисса карда, аз ҷониби ҶДММ “ТРИИКС МЕДИА”-и Федератсияи Россия дар ҳамкорӣ бо Муассисаи давлатии “Тоҷикфилм” наворбардорӣ мешавад, Колдаков Александр    ба Тоҷикистон ташриф оварда, мавриди пазироии роҳбарияти Муассисаи давлатии “Тоҷикфилм” қарор гирифт.
• 26-уми майи соли 2023   дар Муассисаи давлатии «Тоҷикфилм», таҳти раёсати муовини Сарвазири Ҷумҳурии Тоҷикистон, раиси Шурои ҳукуматӣ оид ба рушди кинематографияи миллӣ  Сатториён Матлубахон Амонзода  маҷлиси Шурои ҳукуматӣ оид ба рушди кинематографияи миллӣ, баргузор гардид. Зимни маҷлис лоиҳаи филмномаи Далер Раҳматов “Падару модарам, хоҳарчаам ва Анталия” муаррифӣ ва рӯнамоӣ карда шуд. 
• Дар асоси Нақшаи чорабиниҳои илмиву маърифатӣ, фарҳангиву зеҳнӣ, тандурустию варзишӣ ва бурдани корҳои таблиғотию ташвиқотӣ ва таълимиву тармиявӣ дар шаҳру ноҳияҳои ВМКБ таҳти унвони «Тоҷикистони ягона-Бадахшон нигини он» аз 14.06.2023, №26/4-207  аз 15-ум то 23-юми июни соли 2023 дар шаҳру ноҳияҳои Вилояти Мухтори Кӯҳистони Бадахшон  филмҳои Муассисаи давлатии «Тоҷикфилм» барои сокинон ва алоқамандони синамо намоиш дода  шуданд.

Намоиши филмҳо аз ноҳияи Дарвоз оғоз ёфта, дар шаҳри Хоруғ ҷамъбаст гардид.

Дар доираи чорабинӣ филмҳои  Муассисаи давлатии «Тоҷикфилм» ба монанди филмҳои ҳунарии «Дов» коргардон Муҳиддини Музаффар, «Охирин сайди сайёд» коргардон Муҳаммадрабӣ Исмоил, «Автобус» коргардон Абдулҳай Зокиров, «Рақси зиндагӣ» коргардон Муҳаббат Сатторӣ, «Роҳ» коргардон Носир Саидов ва филмҳои мустанади «Марди роҳ» коргардон Носир Саидов ва «Ваҳдати миллӣ» коргардон Абдулҳай Зокиров тавассути Қасрҳои фарҳанг манзури  сокинони Вилояти Мухтори Кӯхистони Бадахшон гардонида шуданд.

• 19-уми июни соли 2023 вохӯрии директори Муассисаи давлатии «Тоҷикфилм» Маҳмадсаид Шоҳиён бо сафири Ҷумҳурии Туркия дар Ҷумҳурии Тоҷикистон Умут Аҷар баргузор гардид. Дар мулоқот  доир ба рушди минбаъдаи ҳамкориҳо дар соҳаи фарҳангу синамо, филмбардории муштарак, ҷалби мутахассисони соҳа барои филмбардорӣ, дарсҳои «Устоду шогирд», тарҷума ва дубляжи касбии филмҳо ибрози ақида карда шуд.
• 20-уми июни соли 2023 мулоқоти директори Муассисаи давлатии «Тоҷикфилм» Маҳмадсаид Шоҳиён бо муассиси ҶДММ «Сарез сармоя» Ли Мингуян ва ёвари ӯ Ву Шуланро доир карда шуд. Таъкид гардид, ки  тавсеаи робитаю ҳамкориҳои студияҳои  филмистеҳсолкунӣ, филмбардории муштарак, баргузори чорабиниҳои фарҳангию синамоӣ ба рушди минбаъдаи соҳаи фарҳангу синамо заминаи мусоид фароҳам оварда, барои ҳар ду ҷониб манфиатовар хоҳад буд.
• 21-уми июни соли 2023 директори Муассисаи давлатии «Тоҷикфилм» бо муовини Котиби кулли Ассамблеяи халқҳои Авруосиё, Президенти Академияи телевизион ва радиои Авруосиё Рузин Валерий Давидович вохӯрӣ анҷом дод. Зимни вохӯрӣ доир ба тавсеаи робитаю ҳамкориҳои мутақобилан судманд, баргузории чорабиниҳои синамоӣ, дарси «Устод ва шогирд», филмбардории муштарак, тарбия ва омода кардани кадрҳои соҳа изҳори андеша карда шуд.
• 22-юми июни соли 2023 питчинг-рӯнамоии лоиҳаҳои синамоӣ дар кинотеатри ба номи Тоҳир Собиров баргузор карда шуд. Дар доираи питчинг 4 адад лоиҳаи синамоӣ муаррифӣ ва рӯнамоӣ гардида, 3-тояш барои филмбардорӣ тавсия дода шуд.
• Шумораи навбатии маҷаллаи “Кино” бо се забон нашр шуда, дастраси алоқамандони синамо гардид, ки муаррифгари синамои миллист.

 Фаъолияти эҷодию истеҳсоли  муассиса дар нимсолаи аввали соли 2023:    

                   Филмҳои мустанад

• “Студияи “Хатлонфилм”-и раёсати Муассисаи давлатии “Тоҷикфилм” дар вилояти Хатлон филмҳои мустанади “Теппаи таърихии Қурғон” ва “Чилучорчашма”-ро таҳия ва омода намуд.
• Таҳия ва наворбардории филми мустанади “Тоҷикон” бо коргардонии Рустам Шоазимов ва филми мустанади “Роғун –Кохи нур” бо коргардонии Соро Музофиршоева идома дорад.  

                            Филмҳои ҳунарии кӯтоҳ

• Филми ҳунарии кӯтоҳи “Сарчашма” бо коргардонии Пайрав Шарифов пурра омода гардид.
• филми ҳунарии кӯтоҳи “Захм” бо коргардонии Ватандор Шеров комилан омода шуд.

Филмҳои тасвирӣ

• Таҳия ва сохтани қисмҳои аз 21-ум то 35-уми  филми тасвирии “Алифбо” пурра омода карда шуд.

Филмҳои ҳунарии пурра:    

• Наворбардорӣ ва танзиму бандубасти филми ҳунарии “Ҳақиқат” бо коргардонии Манзаралӣ Шералӣ  анҷом ёфта, корҳои рангпардозӣ, садогузорию мусиқиофарӣ барои филм идома дорад.
• Филми ҳунарии “Се хоҳарон…” бо коргардонии Муҳаммадрабии Исмоил  омода карда шуд.
• Студияи “Суғдфилм”-и раёсати Муассисаи давлатии “Тоҷикфилм” филми ҳунарии “Ҷанг бадбахтӣ меорад”-ро бо коргардонии Осим Орифпур таҳия ва наворбардорӣ намуда, танзиму бандубасти филм пурра ба итмом расида, корҳои рангпардозӣ ва садогузории филм идома дорад.
• Давраи омодагӣ барои филмҳои ҳунарии “Падару модарам, хоҳарчаам ва Анталия” бо коргардонии Далер Раҳматов,   “Девона” бо коргардонии Соҳибёр Толибов ва филми ҳунарии кӯтоҳи “Модар” бо коргардонии Нигина Раҷабова шурӯъ гардида, наворбардории  филмҳо дар нимсолаи дуюми соли 2023 дар назар аст.

Ҳамкориҳои байналмилалӣ

             Филмҳои муштарак:

• Дар ҳамкорӣ бо синамонигорони ӯзбек таҳия ва наворбардории филми ҳунарии муштараки “Ҷомӣ ва Навоӣ”  дар соли 2023  ба нақша гирифта шудааст.
• Бо мақсади амалисозии Меморандуми ҳамкорӣ миёни Муассисаи давлатии “Тоҷикфилм” ва Корхонаи воҳиди “Киностудияи миллии “Беларусфилм” коркард ва таҳияи филми ҳунарии “Норак”.
• Ба хотири тақвияти ҳамкориҳо бо “Студияи филмҳои мустанади Санкт-Петербург” таҳия ва омода кардани филми тасвирии “Бабри барфӣ” ва филми ҳунарии “Сукут дар кӯҳҳо”.
• Дар асоси Тафоҳумнома аз 30.12.2022 Муассисаи давлатии “Тоҷикфилм” дар ҳамкорӣ бо ширкати синамоии “Корнома”-и Аморати муттаҳидаи Араб таҳия ва наворбардории филми ҳунарии “Робита”-ро дар шаҳри Душанбе, шаҳри Ҳисор ва ноҳияи Варзоб амалӣ менамояд.

Иштироки филмҳо дар синамоҷашнвораҳо

• Филми ҳунарии “Дов”, ки бо коргардонии Муҳиддини Музаффар аз ҷониби Муассисаи давлатии “Тоҷикфилм” дар ҳамкорӣ бо муассисаи давлатии вилоятии “Суғдсинамо” ба номи Комил Ёрматов рӯйи навор омадааст дар синамоҷашнвораи кишварҳои СҲШ дар шаҳри Мумбайи Ҳиндустон бо ҷоизаи “Таваҷҷуҳи махсуси ҳакамон барои баҳамоварии барҷастаи ҳунарпешаҳо, ки арзиши воқеии дӯстиро ба тамошобин манзур намудааст”, дар Синамоҷашнвораи байналмилалии Чебоксарияи Федератсияи Россия бо ҷоизаи “Беҳтарин филми ҳунарӣ” ва дар Синамоҷашнвораи байналмилалии “Дарвозаи ғарб”-и шаҳри Пскови Федератсияи Россия бо “Ҷоизаи махсуси ҳакамон” қадрдонӣ гардид.
• Филми ҳунарии “Охирин сайди сайёд” дар Синамоҷашнвораи филмҳои донишҷӯён дар шаҳри Ню-Йорки Амрико бо ҷоизаи “Ёддошти ифтихорӣ” сарфароз гардид.
• Филми ҳунарии кӯтоҳи “Моҳича” дар Синамоҷашнвораи филмҳои донишҷӯён дар шаҳри Ню-Йорки Амрико иштирок намуд.

Иқдомҳо

Бо мақсади  тақвияти корҳои эҷодию истеҳсолӣ   дар Муассисаи давлатии “Тоҷикфилм”дар заминаи воҳидҳои кории холӣ бо ҷалби мутахассисони ҳирфаӣ шуъбаи филмноманависон таъсис дода шуда, сохтор ва низомномаи он таҳия ва тасдиқ гардид.

Ҳамин тавр, фаъолияти Муассисаи давлатии «Тоҷикфилм» дар      нимсолаи аввали соли 2023 қаноатбахш арзёбӣ гардида, вазифаҳо барои давраҳои минбаъда муайян ва барои иҷрои босамари онҳо ба масъулин дастуру супоришҳои мушаххас дода шуд.

Маъмурияти “Тоҷикфилм”